திருப்பதி ஏழுமலையான் கோயிலில் வரும் 15-ம் தேதி முதல் நேரடியாக இலவச தரிசன டிக்கெட்டுகள் வழங்க முடிவு செய்யப்பட்டுள்ளதாக தகவல் வெளியாகியுள்ளது.
இது குறித்த ஆலோசனை கூட்டம் திருமலையில் உள்ள அன்னமய்யா பவனில் நடந்தது. கூட்டத்தில் திருப்பதி தேவஸ்தான முதன்மை செயல் அலுவலர் ஜவகர் ரெட்டி மற்றும் தேவஸ்தான அதிகாரிகள் கலந்து கொண்டனர்.
இதையடுத்து ஜவகர் ரெட்டி நிருபர்களிடம் கூறுகையில், பிப்ரவரி மாதத்திற்கான ரூ 300 தரிசன டிக்கெட்டுகள் கடந்த மாதம் ஆன்லைனில் வெளியிடப்பட்டது. வரும் 15-ம் தேதி வரை மட்டுமே ஆன்லைனில் இலவச தரிசன டிக்கெட்டுகள் வெளியிடப்பட்டுள்ளன.
கொரோனா பரவல் குறைந்து வருவதால், வரும் 15-ம் தேதி முதல் திருப்பதி கோயிலுக்கு வரும் பக்தர்களுக்கு இலவச தரிசன டிக்கெட்டுகள் நேரடியாக வழங்குவது குறித்து ஆலோசனை நடைபெறுகிறது.
திருப்பதி அஞ்சனாத்ரி மலையில் உள்ள ஆஞ்சநேயர் கோயில் விரிவாக்கப் பணிகளுக்காக வரும் 16-ம் தேதி பூமி பூஜை நடைபெற உள்ளது.
அஞ்சனாத்ரி ஆஞ்சநேயர் கோயிலுக்கு வரும் பக்தர்களின் நலனை கருத்தில் கொண்டு மலைப்பாதைகள் சீரமைக்கப்படும். மேலும் கோயிலில் சிதிலமடைந்த பகுதிகள் சீரமைக்கப்படும் என தெரிவித்தார்.
