ஒரு வீட்டில் தற்கொலை நடந்துவிட்டால் விசயமறிந்த யாரும் அந்த வீட்டுக்குக்குள் குடிபுகமாட்டார்கள்.ஆனால்,ஒரு வீட்டில் வாடகைக்குக் குடியிருக்கும் மூன்று இளைஞர்களில் ஒருவர், மற்ற இருவரையும் கொடூரமாக கொலை செய்துவிட்டு, அவரும் தற்கொலை செய்து கொள்கிறார். ஊர் மக்கள் இதை ‘பேய் வீடு’ என்கிறார்கள்.
குறைந்த வாடகை என்பதால், அந்தவீடு பற்றிய உண்மை தெரிந்தும் குடியேறுகிறார் நாயகன் அஜய் கார்த்திக். அவரும் தன்னைத் தானே தாக்கிக் கொண்டு இறக்கிறார். வீட்டு உரிமையாளரான கே.பாக்யராஜும் இறக்கிறார்.
இதுகுறித்து காவல்துறை விசாரணை நடைபெறுகிறது. அதில் எல்லாக் கேள்விகளுக்கும் திடுக்கிடும் விடை தெரிகிறது. இதுதான் டார்க் படத்தின் திரைக்கதை.
படத்தில் நாயகனாக நடித்திருக்கும் ஆதர்ஷ் மதிகாந்த், கடன் சுமையால் தவிக்கும் இளைஞராகவும், அமானுஷ்ய சக்தியின் தாக்கத்தில் சிக்கிக் கொள்ளும் மனிதராகவும் சிறப்பாக நடித்திருக்கிறார். பயம், குழப்பம், பதற்றம் என பல உணர்வுகளை இயல்பாக வெளிப்படுத்தியிருக்கிறார்.
ஜோவிதா லிவிங்ஸ்டன் குடும்ப பெண்ணாக கதைக்கு பொருத்தமான தேர்வாக இருக்கிறார். அருவி மதன், சோனியா அகர்வால் ஆகியோர் குறைவான காட்சிகளில் வந்தாலும் மனதில் பதிகிறார்கள். அமுதவாணன், ரபிக் பாட்ஷா, கே.பாக்யராஜ், லிவிங்ஸ்டன் உள்ளிட்டோரும் கதைக்கு தேவையான பங்களிப்பை வழங்கியிருக்கிறார்கள்.
அஞ்சனா நேத்ரனுக்கு அதிக வேலையில்லை என்றாலும் நிறைவாக இருக்கிறார். படத்தில் அதிக கதாபாத்திரங்கள் இல்லை. கே. பாக்கியராஜ் மற்றும் அஜய் கார்த்தி ஆகிய இருவரையும் வைத்தே இயக்குநர் கதையை நகர்த்தியுள்ளார்.
படத்தின் முதல் பத்து நிமிடங்களில் நடக்கும் கொலைக் காட்சிகள் பார்வையாளர்களுக்கு ஒருவித பயத்தை ஏற்படுத்துகின்றன. படம் முடியும் வரை அந்தப் பய உணர்வைத் தக்கவைப்பதில் இயக்குநர் கல்யாண் கே.ஜெகன் வெற்றி பெற்றுள்ளார்.
ஒளிப்பதிவாளர் சங்கீத் மணிகோபால், திகில் காட்சிகளை அச்சமூட்டும் வகையில் காட்சிப்படுத்தியிருக்கிறார். விக்னேஷ் ராஜாவின் பின்னணி இசை பல காட்சிகளில் பயத்தை அதிகரிக்கிறது.
திகில் படத்தை திகில் படமாகவே கொடுத்திருக்கிறார்கள். கதை நகரும் விதம், தொழில்நுட்பத் திறன் மற்றும் நடிகர்களின் எதார்த்தமான நடிப்புக்காக ‘டார்க்’ திரைப்படத்தை தாராளமாக டால்பி, அட்மாஸ் டிஜிட்டல் அனுபவத்துடன் தியேட்டரில் கண்டு மிரளலாம்.
– நிருபர் நாராயணன்
