“மிஸஸ் அண்ட் மிஸ்டர்” திரைப்படத்தை வனிதா விஜயகுமாரின் மகள் ஜோவிகா விஜயகுமார் தயாரித்துள்ளார். வனிதா விஜயகுமார் இயக்கியுள்ளார். படத்திலும் அவர் நடித்துள்ளார். இப்படத்தின் இசை மற்றும் டிரெய்லர் வெளியீட்டு விழா சென்னையில் நடைபெற்றது.
மிஸஸ் அண்ட் மிஸ்டர் படத்தில், ராபர்ட் மாஸ்டர், ஸ்ரீமன், ஷகிலா, செஃப் தாமு, பவர் ஸ்டார் சீனிவாசன், பாத்திமா பாபு, கிரண், ஆர்த்தி கணேஷ் உள்ளிட்டோர் நடித்துள்ளனர்.
விழாவில் நடிகை வனிதா பேசியதாவது:
நான் அமெரிக்காவில் இருந்தபோது ஜோவிகா பிறந்தாள். அந்த குழந்தை நல்லபடியாக பிறக்க வேண்டும் என்று நினைத்தவர் என் அப்பா. எனவே, எனது மகளுக்கும் என் தந்தையின் பெயரை இணைத்து சூட்டினேன்.
எனது மகள் ஜோவிகா தயாரித்த படத்தை நான் இயக்கி நடித்து இருக்கிறேன். கரீனா கபூர், அபிஷேகபச்சனின் வாரிசுகளை திரையுலகில் ரசிகர்கள் ஏற்றுக்கொண்டதைப் போல, ஜோவிகாவையும் ரசிகர்கள் ஏற்றுக்கொண்டு ஆதரவு தர வேண்டும் என கேட்டுக் கொள்கிறேன்.
இந்த திரைப்படத்தை தியேட்டரில் பாருங்கள் நிச்சயம் உங்களுக்கு பிடிக்கும். எனது மகளின் படத்தில் பணியாற்றிய அனைவருக்கும் நெஞ்சார்ந்த நன்றிகளை தெரிவித்துக் கொள்கிறேன்.
இயக்குநர் வசந்த பாலன் பேசியதாவது:
வனிதா நடிக்க வந்த காலத்தில் இருந்தே நான் அவரைப் பார்த்து வருகிறேன். அவரது போராட்டங்கள் மிகவும் பெரியது. தைரியமும் திமிரும் தன்னை பாதுகாத்துக் கொள்ள அவர் உருவாக்கிய ஆயுதம் என்று நினைக்கிறேன். எல்லா பெண்களும் அப்படித்தான் இருப்பார்கள் என்று கருதுகிறேன்.
இந்த ஆணாதிக்க சமூகத்தில் மிஸ்ஸஸ் அண்ட் மிஸ்டர் டைட்டில் மிகவும் அருமையாக உள்ளது. இந்த படம் வெற்றி பெற மனம் நிறைந்த வாழ்த்துக்கள் என்றார்.
– நிருபர் நாராயணன்
