BM பிலிம் இன்டர்நேஷனல் தயாரிப்பில், அறிமுக இயக்குநர் ப. முருகசாமி இயக்கத்தில் உருவாகி வரும் படம் “குயிலி”.
நடிகை லிசி ஆண்டனி முதன்மை கதாபாத்திரத்தில் நடித்துள்ளார். தாஷ்மிகா, தீப்தி, புதுப்பேட்டை சரவணன் உள்ளிட்டோர் முக்கிய வேடத்தில் நடித்துள்ளனர்.
ஒரு தாயின் வாழ்க்கை போராட்டத்தை, மண் சார்ந்த யதார்த்த கதையாக “குயிலி” படம் உருவாகி வருகிறது.
இப்படத்திற்கு ஜூ ஸ்மித் இசையமைத்துள்ளார். இதன் இசை மற்றும் டிரெய்லர் வெளியீட்டு விழா சென்னையில் நடைபெற்றது.
விசிக தலைவர் திருமாவளவன் இசை மற்றும் டிரெய்லரை வெளியிட, பிரபல தயாரிப்பாளர் கே. ராஜன், இயக்குநர் பாலாஜி சக்திவேல் ஆகியோர் பெற்றுக் கொண்டனர்.
விழாவில் திருமாவளவன் பேசுகையில், இந்த படத்தில் வேட்டவலம் த. ராமமூர்த்தி எழுதிய பாடல் மிகச் சிறப்பாக உள்ளது. இது தமிழகம் முழுவதும் ஒலிக்க வேண்டும். நகர்ப்புறங்களில் மட்டுமே புழக்கத்தில் இருந்த போதைப்பொருள் நடமாட்டம் தற்போது கிராமங்கள் வரை ஊடுருவி இருப்பது கவலை அளிக்கிறது. இத்தகைய சூழலில் சமூக பொறுப்புடன் மதுக் கொடுமைக்கு எதிராக விழிப்புணர்வு ஏற்படுத்தும் வகையில், ஒரு திரைப்படம் எடுக்கும் தைரியம் இயக்குநர் முருகசாமிக்கும், தயாரிப்பாளர் அருண்குமாருக்கும் இருப்பதை மகிழச்சியுடன் பாராட்டுகிறேன். “குயிலி” திரைப்படம் வெற்றி பெற மனமார்ந்த வாழ்த்துகளை தெரிவித்துக் கொள்கிறேன் என்றார்.
“குயிலி” படப்பிடிப்பு பணிகள் வேகமாக நடைபெற்று வரும் நிலையில், இப்படம் விரைவில் உலகம் முழுவதும் வெளியாக உள்ளது.
– நிருபர் நாராயணன்
